Ахсынньы 24 күнүгэр Л.Я.Гермогенова аатынан Күөрдэмнээҕи норуодунай тыйаатыр тэриллибитэ 25 сылын бэлиэтээтэ. Дьоро киэһэҕэ үөрүүлээх күнү үйэтитэр фотозона, тыйаатыр айар үлэтин ситиһиилэрин, ону тэҥэ испэктээх түгэннэрин кэрэһэлиир хаартыска быыстапкалара турдулар.

Артыыстар Уус- Алдантан төрүттээх, Саха Өрөспүүбүлүкэтин культуратын үтүөлээх үлэһитэ, Россия Суруйааччыларын сойууһун чилиэнэ И.Сыроватскай — Дүөндүн суруйуутуттан ,, Буурҕалаах дьылларга» диэн Саха сиригэр Олунньутааҕы революция бастакы күннэриттэн историческай личностарга уонна дьиҥ событиеларга олоҕурбут испэктээхтэн быһа тардыыны көрдөрдүлэр.
Дьоро киэһэ наҕараадалааһынынан, бырааһынньыктааҕы остуолунан түмүктэннэ.Үөрүүлээх быһыыга- майгыга Л.Я.Гермогенова оҕолоро Саха Өрөспүүбүлүкэтин Үтүөлээх артыыһыгар, киэҥ туттар биир дойдулаахпытыгар С.Д.Петровка дьиэ- кэргэн аатыттан анал стипендия туттардылар. Маны тэҥэ тыйаатыр режиссера Александрова О.В. эдэр кэскиллээх, көхтөөх артыыстарыгар тыйаатыр значоктарын үөрдэ- көтүтэ кэтэртээтэ.

Урукку кэмҥэ оонньообут артыыстар, ыҥырыылаах ыалдьыттар уруккуну- хойуккуну санаһан, ааспыты ахтыһан, ыллам ырыаларын, истиҥ бэлэхтэрин уунан, үөрэн- көтөн тарҕастылар.