Кулун тутар 21 күнүгэр- Дьөһөгөй күнүгэр,  2 Дьөппөн нэһилиэгин «Ситим» КК  «Сайылык» диэн Үлэ уонна Дьөһөгөй сылыгар аналлаах фестиваль-ярмарка ыытылынна.  Тэрээһин сүрүн сыала- соруга:

• Үлэлээх, дьарыктаах буолууну хааччыйыы;
• Тыа сиригэр хаачыстыбалаах бородууксуйаны оҥорон таһаарыыны көҕүлээһин;
• Оҕуруот аһын, дьиэ кыылларын, отонноох үүнээйилэр  түргэнник ситэр салааларын  билиһиннэрии.

Тэрээһин Дьөһөгөй ыйыгар анал сиэр- туом толоруутуттан саҕаланна. Кэлбит дьон бары сиэри- туому ситэрэн арыылаах алаадьынан, быыппаҕынан күндүлэннилэр. Эдэр ыччаттар хомуска оонньоон дьүрүһүттүлэр, “Дьөһөгөй” үҥкүүтүнэн дьоро күнү киэргэттилэр. «2 – Дьөппөн” МТ Аҕа баһылыга А.Н. Константинов 2-Дьөппөн нэһилиэгин уопуттаах сылгыһытыгар  Роман Афанасьевич Федоровка,  удьуор сылгыһыттарга Дмитрий Дмитриевич, Александр Семенович Лебедевтэргэ махтал суруктары туттартаата. Бу курдук төрүт үгэһи утумнаан сайыннара туралларыгар ыҥырда.

Ярмаркаҕа кытта кэлбит ыалдьыттарбытын «Хаҥалас агрохолдинг» салайааччыта Т.Н. Скрябин тэрилтэтин былаанын, инники соруктарын кэпсээн сэһэргэһиини тэрийдэ. Итинэн сиэттэрэн «НХЗ» Нөмүгүтээҕи килиэп собуота, «Бөртө- Ас» ТХПК үлэлэрин- хамнастарын сырдаттылар. Тэрилтэлэр минньигэс бэйэ оҥоһуга бородууксуйаларын атыытын тилэри тартылар. Ярмаркаҕа  «Куллатыы мүөтэ», «Кучу чэй» атыыта кыттыста.  Дьөппөммүт олохтоохторо экологическай аһы- үөлү хамаҕатык атыыластылар.

Ыҥырыыбытын ылынан кэлбит улууспут улахан производственнай тэрилтэлэригэр

«НХЗ» Нөмүгүтээҕи килиэп собуота, салайааччы  В.А.Нестеровка; «Бөртө- Ас» ТХПК,  салайааччы А.В. Павловка, «Куллатыы мүөтэ» КХ Багдарыын Сүлбэ уола Ньургуҥҥа уонна 2- Дьөппөн орто оскуолатын коллективыгар, салайааччы Д.И.Скрябинаҕа махталбытын тиэрдэбит.

  Федорова С.С.”Ситим”КК дириэктэрэ