Саха АССР төрүттэммитэ 100 сылыгар аналлаах, Россия норуоттарын култуураларын нэһилиэстибэтин сылын, Саха Өрөспүүбүлүкэтигэр Ийэ сылын, Хаҥалас улууһугар историческай өйдөбүл сылын чэрчилэринэн ыытыллыбыт Эркээни ыһыаҕар Күөрдэмнэр көхтөөх кыттыыны ыллыбыт. Ыһыах үөрүүлээх аһыллыытыгар Киин түһүлгэтигэр нэһилиэктэр парадтарыгар Күөрдэм нэһилиэгин делегацията сэлэлии хааман киирдибит. Үөрүүлээх чаас кэмигэр нэһилиэктэр ансаамбыллара кыталык уонна чороонноох үҥкүүннэн киэргэттилэр, Саха сирин, Хаҥалас улууһун гимнын толордубут. Биһиги нэһилиэк түһүлгэҕэ ыраах хотуттан Абый улууһун делегациятын көрүстүбүт. Үөрүүлээх тэрээһин кэмигэр биир дойдулаахпыт, киэн- туттар, тумус-туттар уолбут Саха Республикатын спордун миниистирэ Леонид Николаевич Спиридонов уонна көҥүл тустууга хас да төгүллээх Европа, аан дойду чемпиона, Олимпийскай чемпиона Хаджимурат Гацалов ыалдьыттаатылар. Бука бары төбүрүөннүү түмсэн аҕыйах ахсааннаах хоту норуотун һээдьэтин өрө күүрүүлээхтик эргийдибит.

Эркээни ыһыаҕын күрэхтэригэр «Хаҥалас саргылаах таҥаһа» саха таҥаһын көрүү күрэҕэр Скрябина Ольга Афанасьевна кыттан «Сиэдэрэй тигиилээх саха таҥаһа» номинация ылла, «Ойор-тэбэр оҕо саас түһүлгэтэ» оҕолорго саха фольклорун күрэҕэр Өркөн Скрябин 2 лауреат аатын ылла, «Дьиэрэй-ыллаа, сүппэт тыыннаах өбүгэбит үгэһэ» фольклорнай күрэххэ Саргылаана, Варвара, Айтал Федоровтар дьиэ кэргэнинэн кыттан «Кылыһахтаах куоластаах дьиэ-кэргэн» номинация ыллылар. Ону сэргэ «Мгновения прошлых лет» уруһуйдьуттар күрэхтэригэр биһиги нэһилиэктэн 26 уруһуйдуур дьоҕурдаах дьон кытыннылар. Ырыа-үҥкүү түһүлгэтигэр нэһилиэктэр кэнсиэрдэригэр «Күрүлгэн» үҥкүү ансаамбыла, «Ситим» вокальнай ансаамбыл уонна кырчаан Өркөн Скрябин саҥа буруолуу сылдьар ырыатынан киэргэттилэр.