Кулун тутар 26 күнүгэр Покровскай куорат «Саргы Түһүлгэтэ» СК, Россияҕа Культура үлэһиттэрин күнүн бэлиэтээтибит.
Үөрүүлээх тэрээһин «Таптыыбын төрөөбүт дойдубун» Хаҥалас улууһун нэһилиэктэрин өрөгөй ырыаларын хомуурунньугун сүрэхтэниититтэн саҕаланна. Биһиги нэһилиэктэн автордар Саха АССР культуратын үтүөлээх үлэһитэ, Хаҥалас улууһун уонна 2 — Дьөппөн нэһилиэгин бочуоттаах олохтооҕо, үлэ, тыыл ветерана, Хаҥалас улууһун культуратын ветерана «Дьөппөн сирин таптыыбын» ырыа ааптара Сидорова Акулина Михайловна уонна СӨ суруйааччыларын сойууһун чилиэнэ, СӨ үөрэҕириитин туйгуна, СӨ Мастер-педагога, Хаҥалас улууһун уран тарбахтаах норуот маастара, Күөрдэм нэһилиэгин бочуоттаах олохтооҕо, үгүс кинигэ ааптара Иванова Галина Ивановна — Айтыына Уран «Төрүт түөлбэм» ырыалара кинигэҕэ киирдилэр.
Нэһилиэкпит култууратын сайдыытыгар үгүс кылааттарын уурбут күндү дьоммутугар махталбытын тиэрдэбит! Бу дьоһун кинигэҕэ айымньылара киирбитинэн эҕэрдэлиибит!
Бу үөрүүлээх күн, Л.Я.Гермогенова аатынан Күөрдэмнээҕи норуот тыйаатырын бэриниилээх артыыһыгар Ефимов Николай Николаевичка — «Хаҥалас улууһун уус-уран самодеятельнаһын бэтэрээнэ» бэлиэ туттардылар,
«Ситим» КК методиһыгар, СӨ культуратын туйгуна Скрябина Майя Николаевна — Хаҥалас улууһун культуратын профсоюһун «Бочуотунай грамотатынан» наҕараадаланна, «Ситим» КК дириэктэрэ Иванова Александра Яковлевна — «Саха Өрөспүүбүлүкэтин култууратын туйгуна» бэлиэ тутта.
Күндү дьоммутун үөрэн-көтөн туран эҕэрдэлиибит. Айар үлэҕитигэр ситиһиилэри, айымньылаах-таһаарыылаах үлэни, үтүө доруобуйаны!