Олунньу 23 күнүгэр «Ситим» култуура киинигэр Аҕа дойдуну көмүскээччилэр күннэригэр анаммыт эҕэрдэ кэнсиэр буолан ааста. Сыл кэриҥэ хааччахтааһын кэннэ, дьону көрөөччү саалыгар мунньан, бары ирдэбили тутуһан кэнсиэр тэрийдибит.
2-Дьөппөн нэһилиэгин кэрэ аҥардара ырыа, үҥкүү туруоран таптыыр, ытыктыыр эр дьону бырааһынньыгынан эҕэрдэлээтилэр. Өр кэмҥэ сценаҕа тахсыбатах дьон долгуйуу, үөрүү бөҕө.
Бу дьоро киэһэни ыллам ырыанан киэргэттилэр 2-Дьөппөн орто оскуолатын «Сыдьаайа» вокальнай ансаамбыл, «Ситим» вокальнай ансаамбыл, Раиса Леонтьева, Галина Иванова — Айтыына Уран, Майя Свинобоева, Варя Федорова, Олеся Александрова. Баянынан доҕуһуоллаата — Валерий Кузьмин. Үҥкүүнэн эҕэрдэлээтилэр Каролина Фёдорова уонна култуура үлэһиттэрин үҥкүүтүн бөлөҕө.
Үөрүүлээх киэһэ Л. Я. Гермогенова аат. Күөрдэмнээҕи норуодунай тыйаатыр эр дьон артыыстарыгар, «Сугулаан» эр дьон ансаамбылыгар култуура үлэһиттэрин аатыттан сэмэй бэлэх туттардыбыт. Ону тэҥэ, үтүө санааларынан, нэһилиэкпит үгүс культурнай — общественнай үлэтигэр өрүү күүс — көмө, өйөбүл буолар биир дойдулаахтарбытыгар, маҕаһыын хаһаайыннарыгар «Ситим»култуура киинин аатыттан махтал суруктары туттардыбыт. Ол курдук, «Уйгу» маҕаһыын (А. Кузьмина), «Тоша» маҕаһыын (Д. Михайлов), «Күөрдэм» маҕаһыын (Б. Пахомов), «Сайдыы» маҕаһыын (Н. Прокопьева), «Дуэт» маҕаһыын, Покровскай куорат (К. Охлопкова) уонна Дьокуускай куорат тэрилтэтин салайааччыта Сидоров Д. Б.
Билиҥҥи кэмҥэ, биһи нэһилиэктэн икки уол Россия аармыйатын кэккэтигэр ынырыллан сулууспалыы сылдьаллар. Бу киэһэ, эдэр кэскиллээх ыччаппыт Михаил Скрябин Хабаровскай куорат байыаннай чааһыттан видеонан эҕэрдэ ыытан бар дьонун үөртэ.
Ити курдук, дьоһун-бэлиэ бырааһынньыгы ытыс тыаһынан эҕэрдэлэһэн, истиҥник үөрэн — көтөн бэлиэтээтибит.

«Ситим»🌸 култуура киинэ.